f

Get in on this viral marvel and start spreading that buzz! Buzzy was made for all up and coming modern publishers & magazines!

Fb. In. Tw. Be.

دليل المقرشع لتجربة بيع اسطورية ومربحة!

إذا كنت قد جيت قرشعة أو زرت واحد من أسواق السلع المستخدمة بالعالم فأكيد انك لاحظت كثرة البائعين وكثرة قراشيعهم الي تخلي المشتري يحتار وين يشوف وايش يشتري 😰

خاصة ان طريقة العرض في أسواق السلع المستخدمة تعكس طبيعتها المتواضعة جدًا والبسيطة فما تلاقي المنتجات معروضة على أرفف بطريقة مرتبة مثل المحلات التجارية ولا وجود بطاقات اسم ونوع المنتج وسعره،

غالبا بتلاقي طاوله وحده عليها كل شي “حرفيا” 😅

السؤال الي دايم يجي على بالنا كيف البائع يقدر يجذب المشتري له ويعرض قراشيعه بطريقة حلوة وواضحة وبنفس الوقت يضمن أكبر قدر من المبيعات🤔 ؟!

 

اليوم قررنا نعطيك كبائع بعض النصائح ونلهمك ببعض الأفكار اللي بتساعدك تحقق هالأشياء وأكثر…

نصيحتنا الأولى تتعلق بجمع القراشيع نفسها!

ببساطة رتب غرفتك أو مثل ما نقول “افرزها” وبتتفاجأ من كمية الأشياء اللي عندك ما تحتاجها وكنت ناسي انها عندك أساسا!

طبعا ما يمنع ان عملية الترتيب والفرز تمتد للصالة وغرف اخوانك 😇 تسوي فيهم خير…

تذكر ان القراشيع ممكن تكون تحف، كتب، اجهزة الكترونية، قرطاسية، ديكورات، اكسسوارات، شنط، ملابس نظيفة، اشياء قديمة نادرة وغيرها كثير

 

 

خلال القرشعات اللي سويناها، لاحظنا ان اللافتات اللي عليها عبارات تسويقية تجذب العملاء وتحمسهم للشراء لذلك ننصحك تبدع فيها قد ما تقدر 🎨

عبارات مثل ايش؟

(كل شي بـ 5 ريال) (الزين عندنا والشين حوالينا) (نقبل المكاسرة) (اشتر 2 والثالث مجانا)

(قراشيع متخصصة في …..) (قطع نادره) (قراشيع من حول العالم) وغيرها كثير

 

طيب كيف ممكن تسوي هذي الافتات؟

عندك خيارات كثيرة، منها لوح الطباشير، قطع الكراتين، الفلين، وابسطها ورق الطباعة العادي.

مقرشعينا توصوا في هاللوح وماقصروا

 

 

    

   

 

طريقة عرضك للقراشيع نفسها مهمه جدًا، ممكن تعرضها كلها بشكل عشوائي بدون ترتيب على طاوله مثل كذا 🤭

 

وممكن تبذل مجهود بسيط في ترتيبها وابرازها وتطلع بشكل احلى واريح للعين 🤩 كيف؟

خلنا نقول لك:

دايم احرص ان القراشيع الأكثر طلبا تكون الأقرب للعين والأبرز في الطاولة، ممكن تجمع كل فئة من القراشيع مع بعضها مثلا الكتب بجانب والاكسسوارات بجانب ونحوها. ودايم خل مساحة فراغ كافية بين القطع ولا تراكمها فوق بعضها…

تقدر تستخدم ارفف لعرض الكتب، معلاق لعرض الملابس مصنوع من السلالم أو اعمدة الخشب، طبليه لعرض الاكسسوارات المختلفة

     

 

ممكن تقسمها بصناديق أو شنط  أو كراتين حسب نوعها أو سعرها، أو تستخدم الكراتين عشان تسوي ارتفاعات مختلفة لعرض القراشيع، أو كحامل للاكسسوارات 📦

     

 

وإذا المساحة كبيرة، في ناس تفضل انها تجيب فرشة أرض كمكان عرض اضافي للقراشيع بشكل أوضح

 

مقرشعينا لهم لمسات حلوة بطريقة عرض قراشيعهم، وهذي بعضها ممكن تلهمك

     

 

 

بيع الأشياء المستخدمة يتطلب مهارات تسويق حالها حال بيع المنتجات الجديدة، لذلك، “أيقظ المسوّق الذي بداخلك” 🔥

حرّج على قراشيعك بعبارات حلوة وطريفة وناد على المارين حولك ياخذون طله على طاولتك 📢

تذكر ان القراشيع ما بتبيع نفسها بنفسها،

أكيد ورا كل قطعة من قراشيعك قصة! لذلك سولف مع العملاء وقل لهم قصة القرشوعة اللي لفتت انتباههم، مثلاً: متى ومن وين شريتها، ليه شريتها، ايش يميزها، وليه قررت تبيعها…

قرشعة فرصتك تبني صداقات وعلاقات مع البياعين والمشترين، تبادل معهم وسائل التواصل عشان تطمن على قرشوعتك من فترة لفترة أو مثلا لو كانت القرشوعة كتاب ممكن تناقشون الكتاب سوا بعد ما ينتهي من قراءته!

الرسول صلى الله عليه وسلم اوصى بالجار 😉 طل على جارك المقرشع شف وش عنده واذا جاك أحد يدور على شي عند جارك مب عندك، دله عليك واطلب منه المثل 😎

 

من الأشياء المهمة قبل يوم القرشعة هي انك تسوي قائمة فيها جرد للقراشيع وكل قطعة كم سعرها،

كذا بتترتب أكثر وبتنقذ نفسك من التسعير المستعجل في اللحظة الأخيرة اللي ممكن يظلم بعض قطعك، وبتوفر على نفسك وقت أكثر لترتيب القراشيع وعرضها بطريقة حلوة.

بالنسبة للتسعير فنصيحتنا انك ما تبالغ بالسعر 💸 لا تنسى ان القرشوعة مستخدمة وانت ما تحتاجها من الأساس…

التسعير يختلف من قطعة لقطعة حسب استخدامها، ندرتها، وسعر الشراء الأساسي لها 💰

اذا تذكر سعرها الأصلي ممكن تنقص منه حسب معدل استخدامك لها، وإذا ما كنت تذكره فممكن تسعرها بشكل عشوائي حسب قيمتها عندك أو تستخدم تطبيق Reversee بحيث تحط صورة المنتج ويوريك اسعار مختلفه له

الأسعار ممكن تعرضها بطرق مختلفة، بملصقات التسعير المتعارف عليها، أو بالـtag الورقي، بالمشابه وغيرها من الطرق

 

   

   

 

اخيرًا لا تنسى تصور قراشيعك قبل بيوم كتشويقه لمتابعينك عشان يجون ويشترون من عندك 📸

والأهم انك في يوم القرشعة تصور طاولتك وتشاركها الناس في حساباتك عشان اللي ما لحق يلحق، طبعا ما يحتاج نقول منشن حساب قراشيع عشان نشارك صورتك مع متابعينا 😉

كإضافة اخيرة وبسيطة، ممكن تحط عند طاولتك حلاو، كوكيز، مويه، عصير مجانًا للزوار… هذا الشي يجذبهم ويسعدهم، لأن مين مننا ما يحب الأشياء المجانية؟! ومن مننا ما يحب ياكل ويشرب؟؟

 

متحمسين لإبداعاتك يا رهيب

وعقبال ما تبشرنا بالقروش🤑 والنتايج الطيبة😍

 

كتابة تعليق

You don't have permission to register