سنة جديدة وقرشعة جديدة | تقرير قرشعة #3

وين كنا وايش سوينا هالشهر!

 

قرشعة شهر اوقست كانت مميزة! ليه؟؟

لأنها وافقت ليلة آخر يوم إجازة قبل أول يوم دوام للجامعات والمدار

وبنفس الوقت كانت أول يوم في السنة الهجرية الجديدة 1441 ✨

 

31/8/2019 – 1/1/1441

 

قدرنا نشوف فيها أكثر من 300 متابع ومتقرشع رهيب ونحتفل معاهم بالسنة الجديدة بين القراشيع وبطريقة قرشوعية مختلفة 😍

وبما انها وداعية للإجازة وبداية قوية للاستعداد لسنة دراسية جديدة فأفضل مكان نسوي قرشعة فيه أكيد بيكون قهوة فوكس 📍

فوكس أكثر من مجرد قهوة! من اسمه هو مكان يهيئ لك جو شغل ودراسة وتركيز بحيث تنجز وتستمتع بالقهوة المميزة والحلى اللذيذ!

عشان نضمن اننا ننام بكير ونصحى بكير 😉 قررنا نقدم اجتماعنا هالشهر، فبدل ما نبدأ بيع الساعة 5 خليناها 4 وتفرقنا الساعة 8 🕙

 

      

 

13 بنت وولد رهيبين عرضوا قراشيعهم المتنوعة للبيع، بأسعار رخيصة وقصص مميزة ورا كل قرشوعة!

الحلو ان 6 من هالمقرشعين كانوا حاضرين في قرشعة 2 كمشترين! ولأنهم حبو تجربة الشراء قرروا يقلبون الطاولة ويجربون شعور البيع!

ومن الأشياء الاستثنائية هالمرة ان مقرشعتنا رنا قررت تخلي دخلها من بيع القراشيع كريع خيري لمساعدة الحيوانات 🐰🐱

 

    

     

 

سواء كنت حضرت قرشعة معنا أو لا فأكيد انك سمعت عن الصدا الكبير لـتقويم قرشعة للفصل الأول 🗓

اللي وزعنا منه 140 نسخة حصرية مجانية مطبوعة في قرشعة

لو ما اخذت نسختك من التقويم فلا تخاف مع بعد تطير الطيور بأرزاقها تونا ببداية السنة يمديك تطبع نسختك هنا 🤩

وش بيكون طعم الترم بدون ما نشارككم فيه؟!

 

 

 

 

أكيد وبدون شك ما بننسى نتكلم عن خاطفة الأنظار والقلوب في قرشعة من أمام وخلف الشاشات 🥁

أكياس قراشيع

واللي بتكون متوفرة في كل قرشعة عشان تشترونها، تكشخون وتشيلون قراشيعكم فيها والأهم تساعدونا في الحفاظ على البيئة واستخدام اكياس وبلاستيك أقل!

وفرنا منها تصميمين وخلينا الناس تحتار أيها تختار! لدرجة بعص المقرشعين قرروا يشترون التصميمين بدل واحد بس 😍

 

        

 

لو ما تقدر تجي قرشعة وودك بالشنطة! لا يضيق صدرك بنوفرها في متجرنا الإلكتروني قريبا 😉

خلك حولنا وحوالينا عشان تلحق عليها قبل الزحمة!

 

 

شكرًا لكل اللي تابعوا تغطيتنا على انستقرام وتحمسوا معنا مثل كل مرة! قراشيع بدونكم ولا شي ❤️

وانت؟  إذا ما شفت تغطيتنا يمديك تشوفها وتعرف أكثر وتعيش الجو بجد في حسابنا على انستقرام

 

اللي حضروا معنا هالمرة سواء بعتوا أو اشتريتوا أو حتى بس تفرجتوا، شاركونا واكتبوا عن تجربتكم للعالم!

نشوفكم في قرشعة #4 نهاية شهر سبتمبر ان شاء الله ترقبوا الإعلان لتسجيل التذاكر وخلو عينكم على عداد الصفحة الرئيسية من موقعنا 😎

أخيرًا، ماننسى نشكر مصورتنا الخطيرة لولوة العبدلي على الصور الفنانة مثلها 📸

 

نتمنى لكم عام دراسي موفق وسعيد مثل وقتنا معكم في قرشعة #3 😍🙏🏻

 

      

 

كتابة تعليق